პოზიცია
არქივის კალენდარი
« მარტი 2017 »
ორ სა ოთ ხუ პა შა კვ
   1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31
  
"ბიძინა ივანიშვილმა საქართველოში პოლიტიკა მოკლა" - ინტერვიუ ნინო ბურჯანაძესთან

„დემოკრატიული მოძრაობის“ ლიდერის ნინო ბურჯანაძის განცხადებით, ბიძინა ივანიშვილის ამოცანაა, რომ საქართველოში პოლიტიკური კლასი მოკლას. ბურჯანაძის შეფასებით, ამ მიზნამდე ის გეგმაზომიერად მიდის.

პოლიტიკოსი აცხადებს, რომ ბიძინა ივანიშვილს „ნაციონალური მოძრაობა“ სჭირდება საფრთხობელად, ამიტომაც მან ეს პარტია იმ პოლიტიკური სამარიდან წამოაყენა, რომელიც ბურჯანაძის თქმით, „ნაცმოძრაობას“ „დემოკრატიულმა მოძრაობამ“ გაუთხარა.

 

არჩევნებზე, ალასანიაზე, უსუფაშვილზე, ოპოზიციურ მოლაპარაკებებზე და სხვა საკითხებზე „აიპრესი“ ნინო ბურჯანაძეს ესაუბრა.

 

ინტერვიუ 2003 წლის მოვლენებით დავიწყოთ. ცოტა ხნის წინ საქართველოს ყოფილმა პრეზიდენტმა მიხეილ სააკაშვილმა განაცხადა, რომ ამერიკის მაშინდელი ელჩი ოპოზიციას გაყალბებული არჩევნების აღიარებას სთხოვდა. თქვენ მაშინ ერთ-ერთი მთავარი ფიგურა იყავით. რას იტყვით, რამდენად შეესაბამება სააკაშვილის განცხადება რეალობას პირდაპირ ან თუნდაც ირიბად?

 

ამ ინფორმაციას ნამდვილად ვერ დაგიდასტურებთ, იმიტომ რომ მაგასთან დაკავშირებით არანაირი ინფორმაცია არ მაქვს. რაც ნამდვილად ვიცი ისაა, რომ ამ არჩევნების შედეგების აღიარებას თავად სააკაშვილი აპირებდა. ოღონდ მისი მოთხოვნა იყო ის დაფიქსირებულიყო პირველ ადგილზე გასული ძალა, თუნდაც ერთი ადამიანით, მაგრამ „ბურჯანაძე-დემოკრატებს“ ბარიერი არ უნდა გადაელახათ. ეს იყო მისი საიდუმლო მოლაპარაკების საგანი ავთანდილ ჯორბენაძესა და ხელისუფლების სხვა წარმომადგენლებთან.

 

ბოლოს ის მეორე ადგილზეც თანახმა იყო, ოღონდ „ბურჯანაძე-დემოკრატები“ არ შესულიყვნენ პარლამენტში. სიმართლე არის ეს, რომელიც სამწუხაროდ მე საკმაოდ გვიან გავიგე.

 

რამდენიმე დღის წინ ტელეკომპანია „იმედის“ ეთერში გავიდა გადაცემა „გრიფით საიდუმლო“, რომელიც 2003 წლის მოვლენებს მიეძღვნა. გადაცემაში გარკვეული პირები საუბრობდნენ, რომ „ვარდების რევოლუცია“ დადგმული იყო. ერთ-ერთი რესპონდენტი, მაშინდელი დეპუტატი კობა ამირხანაშვილი ამბობს, რომ ეს ყოველივე მოგვიანებით გაიაზრა. მაგალითად მოყავს ის, რომ სწორედ ამიტომ არ წავიდა ჯარი და სპეცრაზმი მომიტინგეების წინააღმდეგ და ა.შ. გადაცემაში საუბარი იყო იმაზეც, რომ ამერიკული სცენარი არ გათამაშდა, რაც ხელისუფლების არჩევნების გზით შეცვლას გულისხმობდა. ამ შემთხვევაში კი რუსული სცენარი გათამაშდა. რას იტყვის 2003 წლის მოვლენების ერთ-ერთი ლიდერი ნინო ბურჯანაძე ამ საკითხზე?

 

ვერსია ყველას შეიძლება ჰქონდეს. არა მგონია, რომელიმე ვერსია აბსოლუტურად შეესაბამებოდეს ჭეშმარიტებას. რას ნიშნავს დადგმული რევოლუცია? ეს ყველაფერი მოხდა ძალიან სპონტანურად, ეს იმის გამო მოხდა რომ ქვეყანაში რევოლუციური განწყობა იყო. გარწმუნებთ, შევარდნაძე ადეკვატურად რომ მოქცეულიყო და განმეორებითი საპარლამენტო არჩევნები დაენიშნა, არავითარი რევოლუცია არ მოხდებოდა.

 

ის, რომ ვიღაცები ვიღაცებს ელაპარაკებოდნენ, შევარდნაძის ხელისუფლების ზოგიერთი წარმომადგენელი გარიგებული იყო რევოლუციიონერებთან, ზოგი ორმაგ თამაშს თამაშობდა, ზოგი სამმაგს... ეს ახალი არ არის. სამწუხაროდ, პოლიტიკაში ასეთი რაღაცები ყველგან ხდება. მაგრამ, ეს არ ნიშნავს იმას, რომ ყველაფერი დადგმული და გათამაშებული გახლავთ.

 

რაც შეეხება ამერიკული და რუსული სცენარების გათამაშებას, ამაზე რას იტყვით?

 

მე არ ვიტყოდი, რომ ეს ერთმნიშვნელოვნად ამერიკული ან რუსული სცენარი იყო. ამერიკის პოზიცია იყო, რომ განმეორებითი არჩევნები ჩატარებულიყო, ვინაიდან ხალხის მოთხოვნა იყო ასეთი. რევოლუციური სცენარის მომხრე არც რუსები არ ყოფილან. ის, რაც მოხდა იმის გამო მოხდა, რომ ხელისუფლებამ ადეკვატური ზომა ვერ მიიღო და რეალობა ვერ გათვალა, და მეორე ხალხი ძალიან სერიოუზლად იდგა და სერიოზულ ცვლილებებს ითხოვდა.

 

დავუბრუნდეთ დღევადელ რეალობას, თქვენმა პარტიამ ვერ მიიღო ხმათა ის რაოდენობა, რასაც ელოდით. მართალია ამბობთ, რომ არჩევნები გაყალბდა, მაგრამ კიდევ ხომ არ იყო რაიმე მიზეზი რას გამოც თქვენი მოლოდინები ვერ გამართლდა?

 

იცით, რომ ჟურნალისტებს არ ვეკამათები ხოლმე. მოდით, ამჯერად შეგეკამათებით და თქვენს დასმულ კითხვაში ჩემეულ კორექტირებას შევიტან. არ გეთანხმებით იმაში, რომ ჩვენმა პარტიამ ვერ მიიღო ხმების ის რაოდენობა, რასაც ველოდით. ჩვენ 180 000-დან 200 000 ხმამდე მივიღეთ. ეს პრაქტიკულად 12 %-ია, რაც ჩვენი პარლამენტში ყოფნის გარანტიას იძლევა. არ გეთანხმებით არც იმაში, თითქოს მე ვამბობ რომ არჩევნები გაყალბდა. ამას კი არ ვამბობ, არამედ ვამტკიცებ. მტკიცებულება არის ის დაუბალანსებელი ოქმები, რომელიც მე მქონდა ხელში. არა მარტო მე, არამედ არასამთავრობოებსაც, სხვა პოლიტიკურ ძალებსაც. ჩვენ გვქონდა 200-მდე საჩივარი, 500-მდე არასამთავრობოებს, ხოლო 300-მდე სხვა პარტიებს. ამ საჩივრებიდან არცერთი არ განხილულა არსობრივად. ეს ამტკიცებს იმას, რომ ხელისუფლებას სიმართლის ეშინოდა. ასზე მეტი უბნის გადათვლას ვითხოვდი, ერთადერთი უბანი, რომელიც გადაითვალეს იყო მთაწმინდის უბანი. ეს ძალიან სერიოზულ კითხვის ნიშნებს აჩენს. ამერიკაში იყო დარღვევები და ვისკონსინსის შტატში გადათვლა დაიწყო, მაგრამ საქართველოში ისე ჩატარდა არჩევნები, რომ 3750 უბნიდან არც ერთ უბანზე არ ყოფილა დარღვევა?! არგუმენტებისთვისაც არავის შეუწუხებია თავი.

 

სასამართლოების პასუხი იყო, რომ დარღვევები კი არის, მაგრამ ეს არჩევნების შედეგს არ ცვლის და ამის განხილვას აზრი არ აქვსო. ხელისუფლებამ ზუსტად იცოდა, რომ თუ ერთ უბანს მაინც გახსნიდნენ იქ ბურჯანაძეს მესამედი ეწერა და ამიტომ სხვა უბნების გადათვლასაც მოვითხოვდით. ეს მითხრა ერთ-ერთმა მაღალჩინოსანმა და ბიძინა ივანიშვილთან დაახლოებულმა პირმა. რა თქმა უნდა მის ვინაობას არ დავასახელებ, თუმცა გეტყვით იმას, რომ მას ძალიან მაღალი თანამდებობა ეკავა არჩევნების პერიოდში.

 

ერთი უბანიც რომ გადაეთვალათ, ექნებოდა მორალური უფლება ეთქვათ, რომ იცი რა ჩვენ გავხსენით უბანი და თქვენ კი არა ჩვენ ვართ მართალი.

 

თქვენი ინფორმაციით, ხმები სხვა ოპოზიციურ პარტიებსაც დააკლეს?

 

სხვადასხვა ოპოზიციურ პარტიებთან ბრძოლის განსხვავებული მეთოდები იყო გამოყენებული. ბურჭულაძის პარტიის წინააღმდეგ ბრძოლის მეთოდი იყო სრულიად სხვა, როდესაც პარტია საარჩევნო კამპანიის დროსვე დაანგრიეს.

 

ალასანიას პარტიის შემთხვევაში სხვა მეთოდი იყო გამოყენებული, როდესაც პარტიის ლიდერები ფარულად შეხვდნენ ბიძინა ივანიშვილს და იყო შეპირება, რომ ბარიერს გადაგალახვინებთო. შემდეგ ეს შეპირება დაირღვა.

 

„პატრიოტთა ალიანსს“ უბრალოდ ხელი არ შეუშალეს. თუ გადალახავდნენ, გადალახავდნენ თუ არა და თავს არ მოიკლავდნენ. ბრძანება, რომ ბურჯანაძის პარტიამ არ უნდა გადალახოს ბარიერი პირადად ბიძინა ივანიშვილის მიერ იყო გაცემული. ეს ბრძანება გაცემული იყო იმიტომ რომ ბურჯანაძე იყო მისგან უმართავი.

 

ბრძოლის ეს მეთოდები გამოყენებული „რესპუბლიკელების“ მიმართაც იყო?

 

რა თქმა უნდა, ივანიშვილი ებრძოდა „რესპუბლიკურ პარტიასაც“. სრულიად ნათელია ჩემთვის, რომ მას აღარ დასჭირდა „რესპუბლიკური პარტია“ და მის წინააღმდეგ ძალიან სერიოზული ბრძოლა გააჩაღა.

 

საერთოდ ივანიშვილის ამოცანაა, რომ საქართველოში პოლიტიკური კლასი მოკლას. ის ძალიან თანმიმდევრულად აკეთებს ბევრ რამეს. ჯერ კიდევ 2012 წელს განაცხადა ივანიშვილმა, რომ საქართველოში პოლიტიკური ტემპერატურა მაქსიმალურად დაბლა უნდა დავწიოვო. ტემპერატურა ადამიანს ძალიან მაღალი არ უნდა ჰქონდეს, თორემ 35 გრადუსამდე თუ დავა, ადამიანი მოკვდება, რა მნიშვნელობა აქვს ადამიანი 34 და 35 გრადუსით მოკვდება თუ 40 გრადუსით?! ქვეყანაში ტემპერატურა უნდა იყოს, დუღილის მდგომარეობა არ უნდა იყოს, რომ ამან აფეთქება გამოიწვიოს, თუმცა არც ჭაობის მდგომარეობა უნდა იყოს. ივანიშვილს ქვეყნის ჯიბეში ჩადება სურს და ამიტომ უნდა, რომ ქვეყანაში პოლიტიკა მოკვდეს.

 

ივანიშვილის ამოცანა იყო ოპოზიციის განადგურება, მაგრამ არა „ნაციონალური მოძრაობის“, ვინაიდან ის სჭირდებოდა საფრთხობელად. ადამიანები დააყენა არჩევანის წინაშე ან ცუდი უნდა აერჩიათ, ან უარესი. დააშინა ხალხი, თუ თქვენ „ოცნებას“ არ მისცემთ ხმას, ისევ „ნაცმოძრაობა“ მობრუნდება ხელისუფლებაში. სამწუხაროდ, ჩვენი მოსახლეობა კიდევ ერთხელ გაბრიყვდა და მერამდენედ გააკეთა უკვე მცდარი არჩევანი „ნაცმოძრაობის“ ხელისუფლებაში დაბრუნების შიშით. ჩვენს ქვეყანას ნიშს ვერ მოვუგებ, მაგრამ ეს რომ უკვე ძვირად გვიზის ამას მოსახლეობის რაღაც ნაწილი მაინც ხვდება. ჩვენ ქვეყანა აღარ გვაქვს, ეს არის ტერიტორია, რომელიც ჯიბეში ჩაიდო ერთმა მდიდარმა კაცმა. ეს გამონაკლისი სამწუხაროდ მხოლოდ საქართველო აღმოჩნდა, რაც სამარცხვინო ლაქად დაგვრჩება.

 

ჩვენ, რომელმაც ლომის წვლილი შევიტანეთ, „ნაცმოძრაობის“ პოლიტიკურ სამარეში გასტუმრებაში პარლამენტს მიღმა დაგვტოვა. დამეთანხმეთ, რომ 26 მაისის გარეშე ბიძინა ივანიშვილი ვერ გაისტუმრებდა „ნაცმოძრაობას“. სააკაშვილსა და მის გუნდს პოლიტიკური სამარე ჩვენ გავუთხარეთ და ივანიშვილმა გაისტუმრა ისინი იქ, თუმცა ახლა მან ისინი ამ სამარიდან ამოიყვანა და გააცოცხლა და სწორედ ეს ძალა შეიყვანა საკანონმდებლო ორგანოში 27 %-ით.

 

საკმაოდ საინტერესო ინფორმაცია გააჟღერეთ, რომ „თავისუფალი დემოკრატების“ ლიდერები ბიძინა ივანიშვილს ფარულად შეხვდნენო. იმყოფებოდა თუ არა ირაკლი ალასანიაც ამ შეხვედრაზე?

 

რა მნიშვნელობა აქვს იმყოფებოდა თუ არა ალასანია შეხვედრაზე?! ეს შეხვედრა ნამდვილად არსებობდა. არ აქვს მნიშვნელობა იყო თუ არა ალასანია შეხვედრაზე. მთავარია, რომ ლიდერები შეხვდნენ. კონკრეტულად რომელი ამაზე ნუ დავიწყებთ ლაპარაკს.

 

თქვენი ინფორმაციით, ამ შეხვედრაზე საუბარი იმაზეც ხომ არ იყო, რომ თუ „თავისუფალი დემოკრატები“ პარლამენტში ვერ შევიდოდნენ, მაშინ პარტიის ლიდერებსა და „ქართულ ოცნებას“ შორის თანამშრომლობა შედგებოდა?

 

მე მგონი ეს ძალიან ნათლად გამოჩნდა მოვლენების განვითარების შედეგად. ძალიან ნათლად გამოჩნდა რაც მოხდა, ყველა კონკრეტულ პარტიასთან მიმართებაში. ალასანიას პარტია არ არის ჩემთვის მთავარი.

 

კახა შარტავამ პოლიტიკურ პარტიებს შემოგთავაზათ, რომ ერთი საერთო პარტია გააკეთოთ. თქვენ თუ გქონდათ რაიმე ტიპის მოლაპარაკება მასთან?

 

ეს მოლაპარაკება ვერ იქნებოდა, ვინაიდან მისი წინადადება სწორად არ მიმაჩნია. ვისაც უნდა დაშალოს პარტია. ზოგი უკვე პრაქტიკულად დაშლილია, მაგრამ მე რომ გავგიჟდე და პარტია დავშალო ამას მართლა არ მაპატიებენ ის ადამიანები, ვინც პარტიაშია დაარსების დღიდან და უზარმაზარი ბრძოლები გადაიტანა. არც მე არ ვაპირებ პარტიის დაშლას!

 

„ფორუმიდან“ შემდეგ ის განცხადებაც გაკეთდა, რომ პარტიებმა თანამშრომლობის სხვა გზები შემოგვთავაზონ და ჩვენ მათ განსახილველად მზად ვართო...

 

შარტავასთან კომუნიკაცია არ მქონია, მაგრამ სხვადასხვა პარტიებთან არის გარკვეული ტიპის კომუნიკაცია, თუმცა მას კონსულტაციებს ჯერჯერობით ვერ დავარქმევ. არჩევნებამდე ჯერ ძალიან ცოტაა გასული და დროთა განმავლობაში ალბათ უფრო გააქტიურდება. კომუნიკაცია იყო იმ დოკუმენტთან დაკავშირებით, რომელიც პარტიებმა მოვამზადეთ არჩევნების მანიპულაციასთან დაკავშირებით, თუმცა სამწუხაროდ დოკუმენტს ხელი არ მოაწერა „ფორუმმა“, ისევე როგორც ალასანიას პარტიამ.

 

დავით უსუფაშვილთან თუ გქონიათ კომუნიკაცია?

 

დიახ, მე შევხვდი ბატონ დავითს. არჩევნების შემდეგ შედეგებთან დაკავშირებით ვისაუბრეთ. არის თემები, სადაც ჩემი და უსუფაშვილის პოზიციები რადიკალურად განსხვავდება ერთმანეთისგან, თუმცა არის მთელი რიგი საკითხები, სადაც ჩვენი პოზიციები ერთმანეთს ემთხვევა. განსაკუთრებით, ეს ეხება შიდა პრობლემებს. ოპოზიციის ამოცანაა, რომ მუდმივად აქცენტი იმაზე კი არ კეთდებოდეს, სადაც ჩვენი პოზიციები განსხვავდება, არამედ იმ თემებზე, სადაც საერთო ენის გამონახვა შესაძლებელია. ვფიქრობ, რომ არის თემები, სადაც შეიძლება ოპოზიციური პარტიების კოორდინირება და თანამშრომლობა.

 

ირაკლი ალასანიამ პოლიტიკა დატოვა. რას ფიქრობთ მის გადაწყვეტილებასთან დაკავშირებით?

 

მე ვთვლი, რომ ალასანიას მხრიდან არასწორი გადაწყვეტილება იყო მიღებული. როდესაც დემოკრატიული პარტია არჩევნებს აგებს, ის არ უნდა ინგრეოდეს, იშლებოდეს და ლიდერი ბრძოლის ველიდან არ უნდა მიდიოდეს. დემოკრატია ნიშნავს იმას, რომ არჩევნებს ხან წააგებ, ხან მოიგებ.

 

მე ვთვლი, რომ ირაკლი ალასანიას გადაწყვეტილება არ იყო სწორი პოზიცია და ამის შესახებ ვუთხარი კიდეც ირაკლი ალასანიას, იქამდე სანამ ის გააკეთებდა განცხადებას. განცხადების გაკეთებამდე მე და ირაკლი ალასანიამ ვისაუბრეთ და მაშინ ვურჩიე ეს.

 

ახალი მოწვევის პარლამენტის შესახებ რას ფიქრობთ?

 

პოლიტიკური ტემპერატურა ქვეყანაში არის მკვდარი. „ნაცმოძრაობა“ და „ქართული ოცნება“ კი ერთმანეთის გაცოცხლებით არის დაკავებული, მათი ამომრჩეველი კი გულის ფხანით. ქვეყანა კი უკან მიდის.

 

იგივე ლართან დაკავშირებით, ჯერ კიდევ 2013 წლის ივნისში ჩავატარე პირველი ბრიფინგი. მაშინ დემაგოგი და არაპროფესიონალი მეძახეს. თითქოს მთავრობაზე გაბრაზებული ვიყავი და ქვეყანა არ მიყვარს. მაინცდამაინც 3.00-ს უნდა გადასცდეს ლარის კურსი, რათა დაიჯერონ რომ ბურჯანაძე მართალს ამბობდა. მე არ ვარ ეკონომისტი, შესაბამისად რა თემაც არ ვიცი უმაღლეს დონეზე, იმხელა ჭკუა მყოფნის რომ იმ ხალხს ველაპარაკო ვინც იცის ეს თემა უმაღლეს დონეზე. მაშინ ჩემი ბრიფინგის თემა დაფუძნებული იყო უმაღლესი რანგის პოლიტიკოსების პროგნოზზე, რომ ლარის კურსი აუცილებლად გაექცეოდა მთავრობას.

 

შეგიძლიათ ამოიღოთ მაშინდელი ჩემი ბრიფინგი. მექანიზმიც კი იყო მითითებული რა უნდა გაეკეთებინა მთავრობას იმისათვის, რომ ლარის კურსი არ გაქცეულიყო. დედოლარიზაციაზე დღეს რომ ლაპარაკობს მთავრობა, ნახეთ რამდენი ხნის წინ გვაქვს აქცენტი გაკეთებული დედოლარიზაციაზე, როგორც ერთ-ერთ გამოსავალზე, იმისათვის რომლარი მეტ-ნაკლებად სტაბილური იყოს.

 

 

იგივე ეხება ტერიტორიული მთლიანობის საკითხს. 11 დღეა, რაც პარლამენტი მუშაობს (ინტერვიუ ჩაწერილია 29 ნოემბერს ავტ:), ამ საკითხზე მთავრობის გეგმა თქვენ მოისმინეთ? იქნებ მე გამომრჩა. ამ დროს ეს არის ნომერ პირველი პრიორიტეტი. ძალიან მნიშვნელოვანია ეკონომიკა, მაგრამ ისიც ხომ კარგად გვესმის, რომ სანამ ქვეყანა არ გამთლიანდება და სტაბილურ ქვეყნად არ ჩამოყალიბდება, იქამდე ქვეყნის ეკონომიკა ფეხზე ვერ დადგება.

 

როგორ შეიძლება ხელისუფლებას მეორე ვადით ირჩევდნენ და მთავრობა ქვეყნის გაერთიანების გეგმას არ წარმოადგენდეს?! თანაც იმ ვითარებაში, როდესაც ორი კუთხე დედა სამშობლოსთან მოგლეჯილია, მაგრამ მეტის ღირსი ვართ!

 

ამერიკის არჩევნებიც უნდა შეგაფასებინოთ. ერთ-ერთ ბოლო ინტერვიუში მითხარით, რომ ამერიკას არჩევანი ცუდსა და უარესს შორის აქვსო. თქვენი მაშინდელი განცხადების თანახმად, არჩევანი უარესზე გაკეთდა...

 

მე ვერ ვიტყოდი რომ ტრამპი უარესია. შესაძლოა, ის უფრო პოზიტიური შედეგების მომტანი აღმოჩნდეს, ვიდრე ეს ნებისმიერ ჩვენგანს ჰგონია. მე ვხედავ, რომ მსოფლიოში ლიდერების კრიზისი არის. იყო ისეთი ბინძური კამპანია, რომელსაც ჩვენ ვუყურებდით, როდესაც სუპერ სახელმწიფოს ერთ-ერთ პოტენციურ კანდიდატს უკანასკნელი სიტყვებით ლანძღავდნენ. არჩევნების მეორე დღეს კი სიტყვებს ეძებდნენ როგორ გამოასწორონ თავისი ნათქვამი. ეს უკვე ლიდერების კრიზისს ნიშნავს.

 

ამერიკა არის საქართველოს მთავარი პარტნიორი. თქვენი აზრით, შეიცვლება თუ არა რამე საქართველოსა და ამერიკის თანამშრომლობის კუთხით?

 

საქართველო ამერიკის სტრატეგიული ინტერესების არც ათეულშია და არც ოცეულში. როგორი იქნება საქართველოსა და ამერიკის ურთიერთობა ეს მნიშვნელოვან წილად დამოკიდებულია იმაზე, როგორ პოლიტიკას აირჩევს ტრამპი. როგორ დალაგდება ურთიერთობა რუსეთსა და აშშ-ს შორის.

 

რუსეთმა აფხაზეთის ტერიტორიაზე სამხედრო ძალების გაზრდა დაიწყო. თქვენი აზრით, რას უკავშირდება ეს? რაიმე საფრთხე ხომ არ გველის?

 

არავითარი საფრთხე არ გველის. რუსებს სააკაშვილმა მისცა ყველაფერი, რაც მას სჭირდებოდა. „ქართული ოცნება“ და ბიძინა ივანიშვილი კი არაფერს აკეთებს იმისათვის, რომ რაიმე დაათმობინონ იქიდან, რაც მიღებული აქვს. რუსებისთვის ეს ძალიან კომფორტული ვიათარებაა და რასაც უნდათ იმას აკეთებენ, აფხაზეთსა და სამხრეთ ოსეთში. რაც დაჭირდებათ, ყველაფერს გააკეთებენ, ვინმე ხელს შეუშლის?!

 

შს მინისტრმა გააკეთა განცხადება, რომ საოკუპაციო ხაზთან ვითარებას სრულად ვაკონტროლებთო...

 

რითი ვაკონტროლებთ?! ახალგაზრდა ბიჭი გიგა ოთხოზორია ახალგაზრდების თვალსწინ მოკლეს, ეს არის გაკონტროლება თვალწინ რომ მოგიკლავენ ახალგაზრდა კაცს და პასუხსაც ვერ გასცემ?! თუ იმას, რომ კაცს ნახევრად დახნილ მიწას მეორე დღეს აღებულ მოსავალს რომ დაახვედრებენ?! ან იქნებ იმას, ყოველდღიურად მავთულხლართები საქართველოს საზღვრებს შიგნით, რომ გადმოდის?! ამაზე ივანიშვილი გვეუბნება, არ ავყვეთ პროვოკაციას, მოვითმინოთო. ძალიან მაინტერესებს, ჭორვილაში მეზობელმა ნახევარი მეტრით რომ გადაუწიოს მიწა მოითმენს?! და ის მეზობელი მეორე დღეს თავის ოჯახიანად სად აღმოჩნდება.

 

თქვენ ხომ არ აპირებთ მოსკოვში მორიგ ვიზიტს?

 

ვერ გეტყვით. რატომაც არა. ამ წუთში დაგეგმილი ნამდვილად არ მაქვს, იმიტომ რომ ამის აუცილებლობას ვერ ვხედავ. რა თქმა უნდა მექნება კომუნიკაცია, როგორც რუსებთან, ასევე ყველა იმ მიმართულებასთან რომელსაც მე საჭიროდ ჩავთვლი. აუცილებლად მექნება შეხვედრები რუსეთშიც, ევროპაშიც და ყველგან, სადაც საჭიროდ ჩავთვლი.

 
არხის ვებ მისამართი არ მითითებულა.

კვირის ვიდეო









ს სადამკვირვებლო მისიის ხელმძღვანელს შეხ