2010 წლის 23 დეკემბერს „დემოკრატიული მოძრაობის“ თავმჯდომარე და „სახალხო კრების“ აღმასრულებელი საბჭოს წევრი ნინო ბურჯანაძე მოსკოვისა და სრულიად რუსეთის პატრიარქს კირილ მეორეს შეხვდა. რუსეთის პატრიარქთან შეხვედრაზე  განხილულ საქართველო-რუსეთის ურთიერთობების სხვა უმნიშვნელოვანეს საკითხებთან ერთად, ქალბატონმა ნინომ ილორის წმინდა გიორგის სახელობის ტაძრის საკითხი დააყენა.

(შეგახსენებთ, რომ აფხაზეთში არსებულ XI საუკუნის ილორის წმინდა გიორგის სახელობის ეკლესიას ე.წ. სარეაბილიტაციო სამუშაოები ჩაუტარდა, რის შედეგადაც ძეგლის ავთენტურობა დაირღვა).
როგორც პატრიარქმა აღნიშნა, ამ ტაძართან მიმართებაში მას სრულიად განსხვავებული ინფორმაცია ჰქონდა. შეხვედრაზევე კირილ მეორემ საპატრიარქოს წარმომადგენელს დაავალა დაუყოვნებლივ სპეციალური ჯგუფის შექმნა, რომელიც ილორის წმინდა გიორგის სახელობის ტაძარში ჩატარებულ სამუშაოებს გაეცნობა და საკითხს დეტალურად შეისწავლის. 
რუსეთის პატრიარქმა დასძინა, რომ იმ შემთხვევაში, თუ ქართული მხარის ინფორმაცია დადასტურდა, რუსეთის საპატრიარქო აღნიშნულ ფაქტს კატეგორიულად დაგმობს და ყველაფერს გააკეთებს, რათა ტაძარს პირვანდელი სახე დაუბრუნდეს.

 

კირილ მეორემ ხაზგასმით აღნიშნა, რომ რუსეთის მართლმადიდებლური ეკლესიის მხრიდან საქართველოს მართლმადიდებლური ეკლესიის მთლიანობის საკითხი ეჭვგარეშეა და არ განიხილება. რუსეთის პატრიარქმა შეხვედრაზე ასევე განაცხადა, რომ ტაძრის შესახებ დეტალური ინფორმაციის მისაღებად თხოვნით ქართულ მხარესაც მიმართავს.

თბილისში დაბრუნებისთანავე ქალბატონი ნინო ბურჯანაძე უწმინდესსა და უნეტარესს, სრულიად საქართველოს კათალიკოს პატრიარქს, ბიჭვინთისა და ცხუმ-აფხაზეთის მიტროპოლიტს ილია მეორეს შეხვდა და რუსეთის პარტიაქთან შეხვედრის დეტალები გააცნო, რაზეც საქართველოს კათოლიკოს პატრიარქმა ნინო ბურჯანაძეს რუსეთის პატრიარქთან ილორის წმინდა გიორგის სახელობის ეკლესიის საკითხის დაყენებისთვის მადლობა გადაუხადა და რუსეთის პატრიარქის ინიციატივა ძალიან მნიშვნელოვან ფაქტად შეაფასა.

2010 წლის 28 დეკემბერს „დემოკრატიულმა მოძრაობამ“ გამოაქვეყნა ღია წერილი, სადაც საქართველოს კულტურისა და ძეგლთა დაცვის სამინისტროს მიმართა, მიმართვაში ნათქვამია: „ყოველივე ზემოთ აღნიშნულიდან გამომდინარე მოგმართავთ, უმოკლეს ვადაში მედიის საშუალებით საჯარო გახადოთ, ან საქართველოს საპატრიარქოს მიაწოდოთ სრული და ამომწურავი ინფორმაცია იმ სავალალო სახეცვლილებებთან დაკავშირებით, რომელიც აფხაზეთში არსებულ XI საუკუნის ილორის წმინდა გიორგის სახელობის ეკლესიამ ე.წ. სარეაბილიტაციო სამუშაოების ჩატარების შედეგად განიცადა, რათა აღნიშნულ საკითხზე რუსეთის პატრიარქის პოზიციამ ხელი შეუწყოს პრობლემის მოგვარებას“.

დღემდე, საქართველოს კულტურისა და ძეგლთა დაცვის სამინისტროს არც საქართველოს საპატრიარქოსათვის, არც ჩვენთვის და არც მითუმეტეს რუსეთის საპატრიარქოსათვის არ მიუწოდებია არანაირი ინფორმაცია ილორის წმინდა გიორგის ეკლესიის იმ სახეცვლილებების შესახებ, რომელიც მან არასწორად ჩატარებული სარეაბილიტაციო სამუშაოების შედეგად განიცადა.

„დემოკრატიული მოძრაობის“ თავმჯდომარემ ნინო ბურჯანაძემ მიიღო წერილი რუსეთის საპატრიარქოდან, სადაც რუსეთის მხარე ბოდიშს იხდის დაპირების ვერ შესრულების  გამო და სინანულით აღნიშნავს, რომ ქართული მხარის პასიურობისა და დაუინტერესებლობის მიზეზით, დღემდე ვერ მოხერხდა აღნიშნული საკითხის დარეგულირება.

„დემოკრატიული მოძრაობა“ თვლის, რომ ცინიკურია საკუთარი პოლიტიკური ავანტიურებისათვის გამოიყენო ეკლესიის თემა, როგორც ამას საქართველოს დღევანდელი ხელისუფლება აკეთებს.

რომ იყოს რეალური სურვილი და ნება საქართველოს ხელისუფლებისა ილორის სახელობის წმინდა გიორგის ეკლესიისათვის პირვანდელი სახის აღდგენისა, ქართული მხარე რუსეთის პატრიარქის დაპირებას დიდი ხნის წინ გამოეხმაურებოდა, ვინიდან ყველასათვის ნათელია, რომ აღნიშნული საკითხის დარეგულირებას ვერც იუნესკო და ვერც რომელიმე საერთაშორისო ორგანიზაცია ვერ მოახერხებს, უშუალოდ რუსეთის საპატრიარქოს გარეშე.