მაშინ, როდესაც საქართველოში ხელისუფლება აკონტროლებს პრაქტიკულად ყველა საერთონაციონალურ სატელევიზიო არხს, რეგიონალური ტელევიზიების, ინტერნეტ გამოცემებისა და ბეჭდვითი მედიის დიდ უმრავლეობას, უმძიმეს პირობებს უქმნის და ნორმალურად ფუნქციონირების საშუალებას არ აძლევს ისედაც მცირედ შემორჩენილ რეალურად ობიეტურ მედიასაშუალებებს, ჩვენს გაოცებას იწვევს ის ფაქტი, რომ ზოგიერთი დონორი საერთაშორისო ორგანიზაცია საკუთარ ფინანსურ რესურსებს მიმართავს სწორედ ხელისუფლების მიერ მართვად, ისედაც კარგად დაფინანსებულ მედიასაშუალებებისაკენ, რომლებიც პირდაპირ და დაუფარავად ეწევიან არსებული რეჟიმის პოლიტიკის პროპაგანდას თავიანთი დაფარვის არეალში.
რამდენიმე დღის წინ ერთ-ერთმა საერთაშორისო ორგანიზაციამ გრანტი გამოუყო ახალციხეში მოქმედ ტელეკომპანიას, რომლის მფლობელიც “გაწეული სამსახურისათვის” ჯერ ადიგენის გამგებელი გახადა სააკაშვილის ხელისუფლებამ, ხოლო დღეს, ის სამხრეთ საქართველოს რეგიონის საგადასახადოს უფროსია, ხოლო დაფინანსების გამოყოფაზე უარი ეთქვა რეალურად დამოუკიდებელ ტელეკომპანია “თრიალეთს”, რომელიც 1990 წლიდან მაუწყებლობს, სააკაშვილის ხელისუფლების მხრიდან მუდმივი ტერორის ქვეშ იმყოფება და მიუხედავად ამისა ყოველდღიურად შიდა ქართლის მოსახლეობას ობიექტურ და მიუკერძოებელ ინფორმაციას აწვდის.
”დემოკრატიული მოძრაობა” კიდევ ერთხელ მოუწოდებს საერთაშორისო ორგანიზაციებს, რომლებიც შესაძლებელია ქვეყანაში სიტყვის თავისუფლებისა და რეგიონალურ მედიაში არსებული მდგომარეობის შესახებ არ ფლობდნენ სრულ ინფორმაციას, გრანტის გაცემის დროს მაქსიმალურად გაითვალისწინონ ამა თუ იმ მედიასაშუალების თავისუფლების ხარისხი და ნებსით თუ უნებლიედ ნუ შეუწყობენ ხელს სააკაშვილის ხელისუფლების გეგმას, რომ საქართველოში ისედაც მძიმე მდგომარეობაში მყოფი ობიექტური მედიასაშუალებების გაქრობით, საბოლოოდ მოისპოს თავისუფალი სიტყვს.
