“დემოკრატიული მოძრაობა” ყოველთვის ემხრობოდა საერთაშორისო სამშვიდობო ოპერაციებში საქართველოს შეიარაღებული ძალების მონაწილეობას, მაგრამ ჩვენ ვთვლით, რომ მონაწილეობის ხარისხი და სამხედროთა რაოდენობა საქართველოს სახელწიფო ინტერესების, მსოფლიოში საქართველოს როლის ადექვატური უნდა იყოს. მაშინ როდესაც, ბოლო დროს გავრცელებული ინფორმაციით  ამერიკის შეერთებული შტატები 2013 წლისთვის აპირებს საკუთარი შეიარაღებული ძალების ავღანეთიდან გამოყვანას, ხოლო საფრანგეთი თავისი ექვსი ჯარისკაცის დაღუპვის შემდეგ დაუყოვნებლივ აპირებს საკუთარი კონტინგენტის სრულად გამოყვანას, საქართველოს ხელისუფლება მსოფლიოში ერთადერთია, რომელიც ავღანეთში დამატებითი ქვედანაყოფების გაგზავნას გეგმავს.
“დემოკრატიული მოძრაობა” შეშფოთებას გამოთქვამს იმ ფაქტთან დაკავშირებითაც, რომ ისევე როგორც საბჭოთა ხელისუფლება 80-იან წლებში, ჩვენი დღევანდელი ხელისუფლებაც, ავღანეთის მისიაში მონაწილე ქართველი ჯარიკაცების მდგომარეობის შეახებ ინფორმაციას, განსაკუთრებით მალავს.  ამის დასადასტურებლად ის ფაქტიც კმარა, რომ ვიცე-პოლკოვნიკ ტუღუშის დაჭრის ამბავი, რასაც თავდაცვის სამინისტრო უარყოფდა, მხოლოდ სააკაშვილის მიერ მისი ჰოსპიტალში მისი დაჯილდოების შემდგომ გახდა ცნობილი.
“დემოკრატიული მოძრაობა” მოითხოვს ხელისუფლებისაგან ავღანეთის მისიაში მონაწილე ქართულ კონტინგენთან დაკავშირებული ნებისმიერი ინფორმაციის  განსაჯაროებას. მიგვაჩნია, რომ ხალხს აქვს უფლება იცოდეს სიმართლე,  სახელმწიფო კი ვალდებულია მისცეს საკუთარ მოქალაქეებს საშუალება თითოეულ დაღუპულ ქართველ ჯარისკაცს  ღირსეული პატივი მიაგოს.
ცხადია საქართველოს თითოეული მოქალაქის სიცოცხლე ჩვენთვის ძვირფასია, თუმც ჯარიკაცის მოვალეობებიც კარგად გვესმის. ჩვენ ვთვლით, რომ საქართველო ყოველთვის უნდა მონაწილეობდეს ტერორიზმისა და სხვა გლობალური საფრთხეების წინააღმდეგ ბრძოლაში მსოფლიო თანამეგობრობასთან ერთად უკეთესი მსოფლიოს შესაქმნელად. თუმც ყველა ნაბიჯი გადადგმული უნდა იყოს საერთო საქმის სასარგებლოდ და არ უნდა ხდებოდეს ჩვენი მოქალაქეების სიცოცხლით და ჯანმრთელობით სპეკულირება ხელისუფლების უმაღლესი პირის სავარძლის გამყარებისა და მისი რეჟიმის გაპიარების მიზნით.