–ბოლო დროს სახალხო კრებამ პოლიტიკურ პარტიებთან აქტიური კონსულტაციები დაიწყო. ნიშნავს თუ არა ეს იმას, რომ მესამე ცენტრი იქმნება?
–რატომ მესამე ცენტრი და არა პირველი? სახალხო კრება 2010 წლიდან მოყოლებული აქტიურად იბრძვის ამ ხელისუფლების შესაცვლელად. ამ შემთხვევაში ამას მნიშვნელობა არ აქვს. ახლა მთავარია საერთო ენის გამონახვა. აუცილებელია ოპოზიციის გაერთიანება. გაერთიანების გარეშე მიზანს ვერ მივაღწევთ.
–რისთვის უნდა მოხდეს ოპოზიციის გაერთიანება?
–იმისთვის , რომ ქვეყანაში არჩევნები დემოკრატიულად და სამართლიანად ჩატარდეს. ყველა კარგად ვხედავთ, რომ ხელისუფლება დათმობაზე არ მიდის. საარჩევნო გარემოს გაუმჯობესების მიზნით დაწყებული მოლაპარაკებები კრახით დასრულდა. მხედველობაში მაქვს ოპოზიციური რვიანის და შემდეგ უკვე ექვსიანის მოლაპარაკებები. ხელისუფლებამ კანონი კიდევ უფრო გააუარესა. ჩვენ თავიდანვე ვამბობდით, რომ ისინი არაფერს არ დათმობენ. და სწორედ ამიტომ დავიწყეთ მაისში ის აქციები, რომელიც ხელისუფლებამ ასეთი არნახული სისასტიკით დაარბია.
–რატომ გგონიათ, რომ ახლა დათმობენ? ან როგორ აპირებთ ხელისუფლებას პოზიციები დაათმობინოთ?
–კონსულტაციები სწორედ ამიტომ დაიწყო. სწორედ ამიტომ ვაწარმოებთ მოლაპარაკებებს. ჩვენ უნდა ვიპოვოთ გზა, რომლითაც ხელისუფლებას ნორმალური საარჩევნო გარემოს გამოვგლეჯთ.
–ამ მიზნის მისაღწევად აქციების გამართვა თუ იგეგმება?
–ეს მოლაპარაკებების შედეგად უნდა გადაწყდეს. ფაქტი ისაა, რომ რაღაც აუცილებლად უნდა გაკეთდეს. ასე გაგრძელება შეუძლებელია.
–როდისთვის დასრულდება ეს კონსულტაციები?
–კონკრეტულად თარიღის დასახელება არ შემიძლია. ეს მოლაპარაკებები დღესაც აქტიურად მიმდინარეობს. და რაც მეტი ოპოზიციური ძალა ჩაერთვება ამ მოლაპარაკებებში მით უკეთესი იქნება. ჩვენ ყველასთან სიამოვნებით ვთანამშრომლობთ.
–ყველას როცა ამბობთ ყველა პარტიას გულისხმობთ?
–ვგულისხმობ იმ ძალებს, რომლებსაც სურთ ხელისუფლების შეცვლა. ზოგიერთ პარტიასთან ჩვენ გარკვეული უთანხმოება გვაქვს, მაგრამ მათთანაც მზად ვართ დიალოგისთვის. არის თემები, ყველამ უნდა ვითანამშრომლოთ. არსებული კანონმდებლობით არჩევნები დემოკრატიულად არ ჩატარდება. ამიტომ გარემოს შესაცვლელად ყველა ხერხი უნდა იქნეს გამოყენებული. ხელისუფლება დემოკრატიული არჩევნებით უნდა შევცვალოთ. დიახ, ხელისუფლების შეცვლა უნდა მოხდეს და არა გადაბარება. მხოლოდ ამ ხელისუფლების შეცვლით შეიძლება ქვეყნის გადარჩენა. თამამად ვიტყვი, რომ ახლა ქვეყნის გადასარჩენად ვაწარმოებთ მოლაპარაკებებს.
23.01.2012
