ინტერვიუ ნინო ბურჯანაძესთან„ძალიან დიდი ხანია კბილებს ილესავენ, რომ დააპატიმრონ ბადრი ბიწაძე, მაგრამ, ჩვენდა საბედნიეროდ, ვერც მისი მოღვაწეობის მანძილზე და ვერც მისი სამსახურიდან წამოსვლის შემდეგ, ვერ დააფიქსირეს რაიმე უკანონო ქმედება, რადგან ასეთს ადგილი არ ჰქონია. ამიტომაც, პროვოკაციები მოსალოდნელია, მაგრამ ჩვენ მზად ვართ ამისათვის და არ ვაპირებთ არსად გაქცევას და დამალვას.
ის ფაქტი, რომ ასეთმა ბინძურმა ხელისუფლებამაც კი ვერაფერი შეთითხნა, ნათლად მეტყველებს იმაზე, რომ მთელი ის სიბინძურე, რაც ჩვენი ოჯახის მიმართ იღვრებოდა, იყო პოლიტიკური ბრძოლის შედეგი და სიმართლესთან არაფერი ჰქონდა საერთო!
წყნეთის აგარაკის თემა იყო ჩემი დასჯისა და დისკრედიტაციის მექანიზმი. ისიც კი დაგვაბრალეს, რომ თითქოს აგარაკი შიგნით დანგრეული იყო და ისე ჩავაბარეთ. არადა, აგერ თქვენც შეესწარით, რომ სიუჟეტში პატარა ბავშვმა გულწრფელად თქვა, რომ იქ ყველაფერი წესრიგშია. ეს კომენტარი გაეპარათ სიუჟეტში, თორემ ისე არ გაუშვებდნენ!
მე რომ არ ვყოფილიყავი დღეს ოპოზიციაში და გავჩუმებულიყავი, არავის გაახსენდებოდა დღეს ეს აგარაკი და, გარწმუნებთ, რომ ხუთ ასეთ აგარაკს მაჩუქებდა კიდევ სააკაშვილი და ძალიან ბევრ მილიონსაც გადაიხდიდა, რისი შემოთავაზებაც პირდაპირ და ირიბად არაერთხელ გვქონდა!
ათობით და ასობით სხვა ადამიანს, რომელსაც იმავე წესით აქვს მიღებული ქონება, რა წესითაც მე მქონდა წყნეთის ქონება მიღებული, არ ეყო ვაჟკაცობა, ხმა ამოეღო და ეთქვა, რატომ სჯით მარტო ბურჯანაძეს, როდესაც მას კანონი არ დაურღვევია და მისნაირად ქონება მიღებული გვაქვს ასობით ადამიანსო. არც ერთს არ ეყო ვაჟკაცობა შევარდნაძის გარდა, რომელმაც პირდაპირ თქვა, მეც ზუსტად ასეთივე წესით მაქვს მიღებული კრწანისის რეზიდენცია, ოღონდ არავინ მედავება, იმიტომ, რომ, ეტყობა, სააკაშვილი ჩემში საშიშროებას ვერ ხედავს, ბურჯანაძე კი ნერვებს ძალიან უშლისო. მე არ შემიძლია, რომ ამ პოზიციისთვის შევარდნაძეს მადლობა არ გადავუხადო!
მე არაერთგზის გამიკეთებია განცხადება იმასთან დაკავშირებით, რომ საპატრიარქოს წინააღმდეგ მიმდინარეობს აბსოლუტურად მიზანმიმართული კამპანია, რადგან საქართველოს კათოლიკოს-პატრიარქი არის მართლაც შეუვალი ავტორიტეტი, მართლაც უზარმაზარი სულიერი და მორალური ავტორიტეტი არამარტო მართლმადიდებლებისათვის, არამედ ყველა აღმსარებლობის ადამიანისათვის. ხელისუფლებისათვის კი ასეთი ავტორიტეტის ადამიანები არიან ძალიან საშიშნი. ხელისუფლებამ პირველივე დღიდან დაიწყო საზოგადოებაში ავტორიტეტული ადამიანების წინააღმდეგ ბრძოლა, ანუ იმ ადამიანების წინააღმდეგ ბრძოლა, ვისაც ხელოვნებაში, მეცნიერებაში, კულტურაში, სპორტში სიტყვა ეთქმოდა. რატომ? იმიტომ, რომ ხელისუფლება ისეთმა ვერავინ გააკრიტიკოს, ვისაც საზოგადოება დაუჯერებს.
სააკაშვილმა დაკარგა ყველანაირი ნდობა, დაკარგა ავტორიტეტი საერთაშორისო თანამეგობრობაში! რაც შეეხება ქალბატონ ფერერო ვალდნერთან სააკაშვილის შეხვედრას, მე ძლიან კარგად ვიცი, რა თემებზე იყო ამ შეხვედრაზე საუბარი! ამ შეხვედრაზე სააკაშვილს ძალიან მწვავედ დაუსვეს ბევრი საკითხი, მათ შორის, პოლიტპატიმრების, მედიის თავისუფლების და ქვეყანაში არმიმდინარე დემოკრატიული რეფორმების საკითხი! ეს ნამდვილად ვიცი!
სააკაშვილზე ფილმის ბიუჯეტი უნდა იყოს გამჭვირვალე. ითქვა, რომ ამ ფილმს ნაწილობრივ აფინანსებს „მადნეული“, რომელშიც არის რუსული, კერძოდ კი, სერგეი გენერალოვის კაპიტალი. სერგეი გენერალოვი კი პუტინის მეგობარია და როგორ მოხდა, რომ გენერალოვის კაპიტალი აფინანსებს სააკაშვილზე ფილმის გადაღებას? თუ ვინმე იტყვის, რომ გენერალოვი ამას ისე გააკეთებს, რომ პუტინმა არ იცის?
რაც შეეხება დუშეთიდან და ქარელიდან ადამიანების გატაცებას, კარგი იქნება, თუ თქვენი გაზეთის საშუალებით დამეხმარებით და დავსვამთ ამ შეკითხვას: ხელისუფლებამ გამოაცხადა, რომელ ტერიტორიებს აკონტროლებს რუსეთის საოკუპაციო ჯარი? საერთოდ, ჩვენმა მოქალაქეებმა იციან, სადამდე შეუძლიათ მისვლა და სადამდე - არა? ეს პირობითი საზღვრები გამოცხადდა?
ისეთ დამღუპველ დოკუმენტს მოაწერა სააკაშვილმა ხელი, რომ რეალურად ლამის გორის ტრასამდე აკონტროლებენ ტერიტორიას რუსი ჯარისკაცები. გამოაქვეყნოს, აბა, ერთი რუკა სააკაშვილმა, სადამდეა რუსეთის საკონტროლო ტერიტორიები?
გურამ დონაძე - კაცი, რომელიც გახდა სიმბოლო ამ ხელისუფლების ამორალურობის, დანაშაულებრივი ქმედების, ამ ხელისუფლების მიერ ჩადენილი ერთ-ერთი ყველაზე მძიმე დანაშაულის, დღეს ტელევიზიას მართავს!
ჩვენ უნდა ვეცადოთ, რომ ყველა ცივილიზებული მეთოდი გამოვიყენოთ და მივაღწიოთ ვადამდელ საპრეზიდენტო არჩევენებს, თორემ 2013 წელს ძალიან ნაკლები მნიშვნელობა ექნება, ვინ იქნება საქართველოს პრეზიდენტი, იმიტომ, რომ უახლოესი ათწლეულის განმავლობაში შეიძლება ქვეყანას ვეღარაფერი ვუშველოთ!“
„ასავალ-დასავალი“; 02.11.09; ავტ.ჯაბა ხუბუა; გვ.10-11
