ინტერვიუ ნინო ბურჯანაძესთან
„ის რისი მომსწრენიც ბოლო დროს გავხდით, უპასუხისმგებლობაა სახელმწიფოსა და ხალხის წინაშე. პირდაპირ ითქვა, რომ მსგავსი ტიპის ქმედება პრობლემას უქმნის რეგიონის სტაბილურობას. დიპლომატიურ ენაზე ამაზე მკაცრი განცხადების გაკეთება შეუძლებელია.
პრეზიდეტი კარგა ხანია ომობანას თამაშობს. იმიტირებულ „ქრონიკას“ ეტყობოდა, რომ პროფესიონალებმა გააკეთეს, თუმცა შორს იყო ადეკვატურობისაგან. ქვეყანა მართლაც ომის საფრთხის წინაშეა, მაგრამ ამ საფრთხის მატარებელი რეალურად ნინო ბურჯანაძე კი არა, მიხეილ სააკაშვილია.
სააკაშვილს უნდა, ქართველი ხალხი დაარწმუნოს, ვინც უნდა იყოს საქართველოს პრეზიდენტი, რუსეთთან პრობლემებს ვერ მოაგვარებსო. ამიტომაც, ქართველმა ხალხმა თვალი უნდა დახუჭოს სააკაშვილის უმსგავსო ქმედებებზე. სრული პასუხისმგებლობით ვაცხადებ, რუსეთთან ჩვენი ურთიერთობა იდეალური არ იქნება, მაგრამ როგორც კი უპასუხისმგებლო, უთავმოყვარეო და პროვოკატორი სააკაშვილი მოშორდება ხელისუფლებას, საქართველო სტაბილური და მშვიდობიანი გზით განვითარებას დაიწყებს.
სააკაშვილს უმაღლესი თანამდებობა და რანგი აქვს, მაგრამ არავინ ელაპარაკება, არავინ სცემს პატივს და მისი არ სჯერათ. მე კი თანამდებობის გარეშეც მაქვს რანგი და მელაპარაკებიან. მე მაქვს გავლენა ქვეყნის შიგნით და გარეთ გადაწყვეტილების მიღებაზე.
მოსკოვში იმიტომ ჩავედი, რომ მიმეღო კონკრეტული ინფორმაცია, რას ფიქრობენ რუსეთში სააკაშვილის ხელისუფლებიდან წასვლის შემდეგ ჩვენი ქვეყნების ურთიერთობის დარეგულირებაზე. მე ეს ინფორმაცია მივიღე და დავრწმუნდი, რომ შეიძლება რუსეთთან მოლაპარაკება და ქვეყნის საგარეო იზოლაციიდან გამოყვანა, ოღონდ ეს შესაძლებელი გახდება სააკაშვილის ხელისუფლებიდან წასვლის შემდეგ. ამიტომაც, დღეს ცაგერის, ჭიათურისა და თბილისის საკრებულოს არჩვენები კი არა, რეალური ცვლილებები გვჭირდება.
დღეს გეუბნებით და გაიგონეთ, სააკაშვილი კიდევ დაიწყებს ომს და ეს ქვეყანას დაანგრევს.
ისეთი განცდა მაქვს, რომ მთელი ერი გაგიჟდა. სააკაშვილს უნდა თავისი წაგებული ომი მოედანზე გადმოიტანოს და მოგებული რაგბის მატჩით გადაფაროს“.
„კვირის პალიტრა“; 22-28 მარტი; ავტ.იზო რიკაძე; გვ.7
