ინტერვიუ ნინო ბურჯანაძესთან„...ოპოზიციის ნაწილმა ცრუ მოლოდინი გააჩინა. რამდენჯერ უნდა გაგვაცუროს სააკაშვილმა? ზოგი ამბობს, გამოცდილება უნდა მიგვეღოო. რა, საექსპერიმენტო ლაბორატორიაა საქართველო? საქართველოს ხარჯზე სწავლობენ პოლიტიკას? ნათელი იყო ხელისუფლების გეგმა, რომელიც შესრულდა - ხელისუფლებამ იმიჯი ნაწილობრივ გაირეცხა! სააკაშვილს მეორე სუნთქვა გაეხსნა! ეს დანაშაულია ქართველი ხალხის წინაშე! და თუ გაბედავენ, იმ ადამიანებს უთხრან, 2 წელი მალე გავაო, ვინც ციხეში ტყუილად ჩასვეს. დიახ, ვინც არჩევნებზე წავიდა, სააკაშვილის სცენარში ჩაერთო. ჩვენ კი, ყველაფერი უნდა გავაკეთოთ, რომ ეს ქვეყანა მართლაც დემოკრატიული გახდეს...
...განსხვავებით კოლეგებისგან, რომლებსაც ბურჯანაძის ხსენება ჰობად ექცათ, გვარების დასახელება არ მაინტერესებს. საზოგადოებას სჭირდება თვალის გახელა და გაანალიზება, ვინ როგორ იმოქმედა, ვინ საით წაიყვანა პროცესი, ვინ რას დაპირდა ხალხს, ვინ დათანხმდა დიალოგზე, საიდანაც ხელცარიელი დაბრუნდა... იცით, არჩევნებზეც არაა საქმე. ზოგადად, ქარის მობერვაზე ოპოზიციის აქეთ-იქით გადაქან-გადმოქანებამ დააზარალა პროცესი. შარშანაც, გადავკეტავდით ქუჩას, გაიხსნებოდა. ვიტყოდით, არ მივდივართ დიალოგზე, მერე ვიღაც ღიად, ვიღაც ჩუმად გავარდებოდა. პრობლემა იყო ისიც, არჩევნებზე აგვისტოში რომ დათანხმდნენ და სექტემბერში კანდიდატები დაასახელეს. ისე, რატომ არ მიიღო მონაწილეობა საკრებულოს თავმჯდომარეობის კანდიდატმა?
საზოგადოებას არ უჩნდება კითხვა სუბართან დაკავშირებით? არაა სოზარი არასერიოზული ადამიანი, რომ ეს გადაწყვეტილება საფუძვლის გარეშე მიეღო. ალბათ, სერიოზული საფუძველი ჰქონდა. საბოლოოდ, ერთი წელი ვაჩუქეთ სააკაშვილს, რადგან პროცესი საარჩევნო რეჟიმში გადავიდა...
...ვერ ვხედავ რაიმე ტიპის ალიანსის ან გაერთიანების შექმნაზე საუბრის საფუძველს. იმდენად გართულებულია ვითარება, გამოსავალი სახალხო კრებაა...
...საქმისა და ქვეყნის ინტერესებიდან გამომდინარე, რა ეტაპზეც ვისთან ჩავთვლი საჭიროდ, იმასთან წავალ სასაუბროდ. „მინუსებით“ არ ვლაპარაკობ იმ ადამიანებზე, ვისი ამოცანაც სააკაშვილის ხელისუფლების შეცვლაა. ოქრუაშვილის ამოცანა, ნამდვილად არის ეს. ასე რომ, საუბრის პრობლემას ვერ ვხედავ...
სახალხო კრება, თავისი არსით, გულისხმობს, რომ არანაირი პლუსები და მინუსები არ უნდა დაიწეროს. სახალხო კრება ყველასია, ვისი ამოცანა და მიზანიც ემთხვევა შენსას...
...ბურჯანაძისა და კრების ინტერესები ემთხვევა - ხელისუფლების შეცვლა გვინდა.
...კურტანიძე ერთ-ერთი ყველაზე ღირსეული ადამიანია. ხელისუფლება დაინანებდა მისთვის ფულის მიცემას, სხვებივით აღება რომ ეკადრა? ლუკა კურტანიძემ უარი თქვა გამოსამშვიდობებელ მსოფლიო ტურნეზე. ის, იცით, რას ნიშნავს? მეამაყება, იგი მეგობრად რომ მთვლის, და მისნაირები გვერდით რომ მიდგანან...
...დღეს ბრძოლა ღირსების საგანია. მატყუარა, უპასუხისმგებლო, უსირცხვილო ხელისუფლება გვყავს. დაკარგული ტერიტორიების ფონზე წარმატებებზე ლაპარაკობენ... ამიტომ ვართ ჩართულები აქტიურად კრებაში...“
„ვერსია“, 30.06-01.07, ავტ.ნინო ლურსმანაშვილი, გვ.3
